ՀՀ-ում Ազգային ժողովի, տեղական ինքնակառավարման մարմինների ընտրության կամ հանրաքվեի օրը 18 տարին լրացած ՀՀ քաղաքացիներն ունեն ընտրելու և հանրաքվեին մասնակցելու իրավունք:

Ընտրելու, ինչպես նաև հանրաքվեին չեն կարող մասնակցել՝

• դատարանի՝ օրինական ուժի մեջ մտած վճռով անգործունակ ճանաչված, 
• դիտավորությամբ կատարված ծանր հանցանքների համար օրինական ուժի մեջ մտած դատավճռով դատապարտված,
• և պատիժը կրող անձինք:

Ընտրողների վերջնական ցուցակը քվեարկության օրվանից 7 օր առաջ տեղադրվում է Կենտրոնական ընտրական հանձնաժողովի կայքում և ՀՀ ներքին գործերի նախարարության կայքում՝ ներբեռնելու հնարավորությամբ:

Եթե ցանկանում ես գտնել քո ընտրատեղամասը, որտեղ պետք է գնաս ու քվեարկես, ապա անհրաժեշտ է՝ 

• մուտք գործել elections.mia.gov.am կայք,
• սեղմել «Գտիր քո տեղամասը» կոճակը,
• լրացնել տվյալներդ, 
• գտնել ընտրատեղամասդ։

Ստուգել ընտրողների ցուցակը կարող ես ընտրությունները կազմակերպող մարմնի կայքում։ 

Դրա համար անհրաժեշտ է՝ 

• կայքում ընտրել «Ընտրողների ռեգիստր» բաժինը,  
• բացված էջում մուտքագրել քո անունը, ազգանունը և ծննդյան տարեթիվը,
• սեղմել «Ես ռոբոտ չեմ» կոճակը,
• սեղմել «Որոնել» կոճակը։ 

Եթե տվյալներդ լրացնում ես ու ցուցակներում չես գտնում քեզ կամ կա հասցեի, անվան, ազգանվան որևէ սխալ, ապա դիմիր Ներքին գործերի նախարարության միգրացիայի և քաղաքացիության ծառայություն կամ ընդհանուր իրավասության առաջին ատյանի դատարան ընտրություններից 12 օր առաջ։ 

Ըտնրությունների օրը քվեարկելու համար անհրաժեշտ է ներկայացնել անձնագիր կամ նույնականացման քարտ (ID քարտ)։

Քվեարկությունն անցկացվում է միայն ՀՀ տարածքում կազմավորված տեղամասային կենտրոններում, ժամը՝ 08։00-ից մինչև 20։00-ն։

Արտերկրում բնակվող ՀՀ դիվանագիտական կամ հյուպատոսական ներկայացուցչություններում դիվանագիտական ծառայություն անցնող ընտրողները և նրանց հետ արտերկրում բնակվող ընտանիքի՝ ընտրելու իրավունք ունեցող անդամները և օտարերկրյա պետություններում երկարատև ծառայողական գործուղման կամ ուսման մեջ գտնվող զինծառայողները կարող են մասնակցել ԱԺ ընտրություններին` քվեարկելով էլեկտրոնային եղանակով` ԿԸՀ-ի կողմից սահմանած կարգով և ժամկետներում: 

Արտերկրում ընտրելու համար պետք է նախապես գրանցվել դեսպանատան միջոցով կամ էլեկտրոնային եղանակով՝ հատուկ ձևաթղթի լրացմամբ։

Ուշադրություն
Էլեկտրոնային եղանակով քվեարկության ժամկետները, հայտի ձևը, գրանցման մանրամասները սահմանված են ՀՀ ԿԸՀ 2016 թվականի հունիսի 17-ի N 32-Ն որոշմամբ։ 

Օրենքով կարող է սահմանվել ՀՀ քաղաքացիություն չունեցող անձանց՝ տեղական ինքնակառավարման մարմինների ընտրություններին և տեղական հանրաքվեներին մասնակցելու իրավունքը:

Հաշմանդամություն ունեցող անձանց հնարավոր է տրամադրել շարժական քվեատուփ կամ ընտրել ընտրատեղամասերից ամենահարմարն ու մասնակցել ընտրություններին՝ այդ ընտրատեղամասում քվեարկելով։  

Այս տարբերակով քվեարկության համար անհրաժեշտ է նախապես դիմում ներկայացնել ընտրական հանձնաժողովին։

Դիմումներն անհրաժեշտ է ներկայացնել ընտրություններից 12 օր առաջ։ 

elections.am կայքում ներկայացված են այն ընտրատեղամասերը, որոնք հարմարեցված են հաշմանդամություն ունեցող անձանց համար։ 

Շրջիկ արկղի միջոցով քվեարկելու իրավունք ունեն՝

• Ստացիոնար բուժում իրականացնող բժշկական հաստատություններում ստացիոնար բուժման մեջ գտնվող,
• քվեարկության օրը տեղամասային կենտրոն ինքնուրույն ներկայանալու հնարավորություն չունեցող,
• ռազմաբժշկական հաստատությունում ստացիոնար բուժման մեջ գտնվող զինծառայողները,
• ձերբակալված անձանց պահելու վայրերում ձերբակալվածները

Եթե ընտրողը չի ներկայացնում քվեարկության կտրոն, ապա ինքնասոսնձվող դրոշմանիշ փակցնող և քվեատուփի համար պատասխանատու անդամը տեղեկացնում է տեղամասային ընտրական հանձնաժողովի նախագահին, որն ընտրողից վերցնում է քվեարկության ծրարը, անհապաղ մարում է՝ առանց ծրարի պարունակությունը ստուգելու:

Հանձնաժողովի անդամը ստուգում է կտրոնը և առանց քվեարկության ծրարն ընտրողից վերցնելու քվեաթերթիկին է փակցնում ինքնասոսնձվող դրոշմանիշը, որից հետո բացում է քվեատուփի ճեղքը, և ընտրողը քվեարկության ծրարը գցում է քվեատուփի մեջ:

Եթե ընտրողը կարծում է, որ քվեաթերթիկը սխալ է լրացրել կամ վնասել է, ապա կարող է դիմել հանձնաժողովի նախագահին` նոր քվեաթերթիկ ստանալու համար:

Հանձնաժողովի նախագահի հանձնարարությամբ ընտրողին հատկացվում է նոր քվեաթերթիկ (Ազգային ժողովի ընտրությունների ժամանակ` քվեաթերթիկներ): 

Սխալ լրացված (վնասված) քվեաթերթիկը անհապաղ մարվում է:

Քվեարկելուց հետո ընտրողն անհապաղ պետք է դուրս գա քվեարկության սենյակից։

18 տարին լրացած ՀՀ կամ օտարերկրյա քաղաքացի, որը ներկայացնում է հավատարմագրված դիտորդական կազմակերպություն։

Դիտորդը հետևում է քվեարկության ընթացքին՝ ընտրատեղամասերում կամ տարածքային հանձնաժողովներում։ Արձանագրում է խախտումներ, կազմում զեկույցներ, ապահովում է թափանցիկություն։

Վստահված անձ կարող է լինել միայն այն անձը, ով՝

• ՀՀ քաղաքացի է,

• Գրանցված է այն կուսակցության կամ դաշինքի կողմից, որը մասնակցում է ընտրություններին,

• Համաձայն է ներկայացնել տվյալ թեկնածուի կամ կուսակցության շահերը։

Վստահված անձը՝

• Հետևում է քվեարկության և հաշվարկման օրինականությանը,

Վստահված անձը կարող է՝ 

• ներկայացնել բողոքներ կամ դիտարկումներ հանձնաժողովին,

• ներկա լինել քվեարկության ընթացքում,

• ունենալ կապի միջոցներ և արձանագրել ընտրական գործընթացը՝ առանց խոչընդոտելու։

Հանձնաժողովի անդամ դառնալու համար անհրաժեշտ է՝

• լինել ՀՀ քաղաքացի,
• լինել 18 տարին լրացած,
• ունենալ ընտրական իրավունք,
• չլինել ծանր կամ առանձնապես ծանր հանցագործության համար դատապարտված,
• չունենալ չհաղորդված դատվածություն։

Հանձնաժողովի անդամը մասնակցում է ընտրությունների կազմակերպման և անցկացման ամբողջ գործընթացին, մասնավորապես՝

• Նշում է ընտրողների ցուցակը,
• հսկում է քվեարկության ընթացքը,
• հաշվում է քվեաթերթիկները,
• ստորագրում է արձանագրությունները,
• հետևում է ընտրությունների օրինականությանը տեղամասում։

Այցելու կարող են դառնալ ՀՀ-ում գրանցված, միջազգային կազմակերպությունների կամ օտարերկրյա պետությունների ներկայացուցիչներ, դիվանագետներ, ովքեր չեն հանդիսանում դիտորդական առաքելության կամ ԶԼՄ-ի ներկայացուցիչ։

Այցելուն կարող է՝

• Ազատորեն այցելել ընտրական տեղամասեր, 
• դիտել քվեարկության և հաշվարկման գործընթացը,
• ծանոթանալ ընտրությունների անցկացման պայմաններին։

Այցելուն չի կարող՝ 

• Միջամտել կամ ներգրավվել ընտրական գործընթացին,
• հարցեր տալ հանձնաժողովի անդամներին կամ ընտրողներին,
• որևէ ձևով ազդել գործընթացի վրա։

ԶԼՄ ներկայացուցիչ կարող են դառնալ պետականորեն գրանցված լրատվամիջոցների լրագրողները, օպերատորները կամ խմբագիրները, ովքեր ցանկանում են լուսաբանել ընտրությունները։

ԶԼՄ ներկայացուցիչները իրավունք ունեն՝

• Մուտք գործել ընտրատեղամասեր և ընտրական հանձնաժողովներ,
• լուսանկարել, տեսանկարել և հարցազրույց վերցնել՝ առանց խանգարելու քվեարկության ընթացքին ու գաղտնիությանը,
• հետևել քվեարկության և հաշվարկման ընթացքին,

ԶԼՄ ներկայացուցիչները իրավունք չունեն՝

• Մասնակցել ընտրական գործընթացին,
• արտահայտել որևէ քաղաքական դիրքորոշում տեղում։