Ինչպե՞ս դիմել

Իրավաբանական կրթություն ունեցող ՀՀ քաղաքացիները կարող են ստանալ նոտարական որակավորում՝ անհրաժեշտ փաստաթղթերը ներկայացնելով Արդարադատության նախարարություն (հասցե՝ Երևան, Վազգեն Սարգսյան փ. 3/8)։

Ներկայացվող պահանջներ

Նոտարի որակավորման ստուգման համար կարող է դիմել գործունակ, դատվածություն չունեցող, իրավաբանի բակալավրի կամ դիպլոմավորված մասնագետի որակավորում ունեցող այն ՀՀ քաղաքացին, որը՝ 

• ունի 6 ամսվա ստաժավորում նոտարական ոլորտում կամ, 
• ունի իրավաբանի 3 տարվա մասնագիտական փորձ (կամ գիտական աստիճան) և 3 ամսվա ստաժավորում նոտարական ոլորտում կամ, 
• ունի 5 տարվա մասնագիտական փորձ (կամ գիտական աստիճան) իրավաբանության ոլորտում։

Պահանջվող փաստաթղթեր

Դիմորդը որակավորման ստուգման համար Հայաստանի Հանրապետության արդարադատության նախարարություն է ներկայացնում` 

• դիմում,
• 2 հատ 4 x 6 չափի գունավոր լուսանկար,
• անձնագիր կամ անձը հաստատող այլ փաստաթուղթ և դրանց պատճենները,
• բարձրագույն իրավաբանական կրթության վկայականի պատճենը,
• նոտարական ստաժավորում անցնելու դեպքում ստաժավորումը ղեկավարող նոտարի եզրակացությունը,
• վճարված պետական տուրքի անդորրագիրը:
  

Վճարման չափը և կարգը

Նոտարի թեկնածուների որակավորման ստուգման համար պետական տուրքը կազմում է 20,000 դրամ, որը անհրաժեշտ է վճարել հետևյալ գանձապետական հաշվին՝ 900005163622 (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը)։ 

Տրամադրման ժամկետը և կարգը

Որակավորման ստուգումն անցկացվում է հայերենով և դռնբաց։ Ընթացքին կարող են հետևել նաև ԶԼՄ ներկայացուցիչներ։ 

Որակավորման ստուգումը կատարվում է 3 փուլով․

• Թեստավորում․ Թեստերը կազմում է արդարադատության նախարարությունը։ Նմուշները հրապարակվում են քննությունից 10 օր առաջ ՀՀ արդարադատության նախարարության պաշտոնական կայքում։ Թեստավորման փուլի արդյունքների մասին դիմորդը պատշաճ ձևով տեղեկացվում է ոչ ուշ, քան թեստավորման փուլի ավարտին հաջորդող մեկ ժամվա ընթացքում: Թեստավորման ժամանակ արգելվում է օգտվել  ձեռագիր կամ տպագիր նյութերից և հեռահաղորդակցության միջոցներից։

• Գործնական խնդիրներ․ Թեստավորման փուլը հաջողելուց հետո դիմորդին տրվում են նոտարական ոլորտի 10 խնդիր (յուրաքանչյուրը՝ 10 միավոր)։ Խնդիրների լուծման համար տրվում է 4 ժամ: Թույլատրվում է օգտվել տպագիր նյութերից և համակարգչից, բայց ոչ կապի միջոցներից: 

• Հարցազրույց․ Այս փուլին մասնակցում են խնդիրների փուլից նվազագույնը 85 միավոր հավաքած դիմորդները: Հարցազրույցն անցկացնում է անձամբ Արդարադատության նախարարը:

Հղում օրենսդրությանը

• «Նոտարիատի մասին» ՀՀ օրենք
• ՀՀ կառավարության 2011 թվականի սեպտեմբերի 29-ի N 1463-Ն որոշում

Իրավական ակտերը հնարավոր է գտնել arlis.am-ում (անհրաժեշտ է կարդալ ակտերի վերջին տարբերակը)