Ուշադրություն
Անչափահասի դեպքում վերջինիս ՀՀ քաղաքացիություն ստանալու դիմումը ներկայացնում է ծնողը։

Քաղաքացիության շնորհման վարչությունում մինչև 18 տարեկան անչափահասների ՀՀ քաղաքացիության շնորհման գործեր չեն վարվում։

Ներկայացվող պահանջները

ՀՀ քաղաքացիություն ստանալու համար անհրաժեշտ է՝

• լինել ՀՀ ժամանակավոր պաշտպանություն ստացած անձ:

Պահանջվող փաստաթղթերը

ՀՀ քաղաքացիություն ստանալու համար տեղում կլրացվի դիմում, որին կից անհրաժեշտ է ներկայացնել՝

• «070» ծածկագրով վավեր անձնագիրը և ժամանակավոր պաշտպանության վկայականը,
• 35 x 45 մմ չափի 6 լուսանկար (գունավոր),
• ծննդյան վկայականը և դրա պատճենը,
• ամուսնության (ամուսնալուծության) վկայականը, դրա պատճենը և ամուսնու անձնագրի պատճենը (եթե փոխել է ազգանունը ամուսնության հիմքով),
• անձնական տվյալներում փոփոխություն կատարելու վերաբերյալ փաստաթուղթ (եթե անձը կատարել է նման փոփոխություն),
• պետական տուրքի վճարման անդորրագիր։
  
  

Օտար լեզվով փաստաթղթերը անհրաժեշտ է ներկայացնել հայերեն թարգմանված և նոտարական կարգով հաստատված։ 

• Հայկական ազգություն չունեցող անձինք ՀՀ քաղաքացիության դիմում ներկայացնելուց տեղում պետք է հանձնեն ՀՀ Սահմանադրության թեստ։
• 1981 թվականի նոյեմբերի 28-ից հետո ծնված դիմումատուները պետք է ներկայացնեն նաև ծնողների անձը հաստատող փաստաթղթերը, ծնողների ամուսնության վկայականը (բացակայության դեպքում՝ հայրության ճանաչման վկայականը կամ միայնակ մայր հանդիսանալու վերաբերյալ տեղեկանքը, կամ մահվան վկայականը)։

Անչափահասի դեպքում անհրաժեշտ է ներկայացնել հետևյալ փաստաթղթերը՝

• ծննդյան վկայականը,
• ծնողների գրավոր համաձայնությունը, եթե ծնողներից միայն մեկն է ՀՀ քաղաքացի,
• ծնողների ամուսնության վկայականը, մահվան վկայականը, հայրության ճանաչման վկայականը կամ միայնակ մայր լինելու մասին տեղեկանք կամ անհայտ բացակայող կամ մահացած ճանաչվելու վերաբերյալ դատարանի վճիռը,
• ծնողների անձը հաստատող փաստաթուղթը,
• 35 x 45 մմ չափսի 2 լուսանկար,
• պետական տուրքի վճարման անդորրագիրը։

Վճարման չափը և կարգը

ՀՀ քաղաքացիություն ստանալու համար դիմելիս անհրաժեշտ է վճարել 1,000 դրամ։

Վճարումն իրականացվում է հետևյալ եղանակներից մեկով՝ 

• E-payments համակարգի միջոցով,
• բանկային փոխանցման միջոցով ՀՀ պետական բյուջեի հաշվեհամարին՝ 900005160529 (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը)։

Ուշադրություն
2025 թվականի սեպտեմբերի 1-ից Լեռնային Ղարաբաղից բռնի տեղահանված և ժամանակավոր պաշտպանություն ստացած անձինք ազատվում են պետական տուրքի վճարից։ 

Տրամադրման ժամկետը և կարգը

• Քաղաքացիություն ստանալու դիմումները քննարկելու համար սահմանված է 90 աշխատանքային օր, սակայն ԼՂ ժամանակավոր պաշտպանություն ստացած անձանց դիմումները քննարկվում են հնարավորինս սեղմ ժամկետներում։
• Քաղաքացիություն ստանալու դիմումը ներկայացնելուց հետո անձը ստանում է իր անհատական ծածկագիրը SMS հաղորդագրությամբ՝ իր դիմումի համարով կամ նամակ էլեկտրոնային հասցեին, որով կարող է հետևել դիմումի ընթացքին։
• ՀՀ քաղաքացիություն ստանալու դիմումը բավարարվելու դեպքում անձը այդ մասին տեղեկացվում է SMS հաղորդագրությամբ կամ էլեկտրոնային հասցեին ուղարկված նամակով։
• Այնուհետև անհրաժեշտ է կրկին դիմել Միգրացիայի և քաղաքացիության ծառայություն՝ ՀՀ քաղաքացու անձնագիր ձեռք բերելու համար։

Ուշադրություն 
ԼՂ-ից բռնի տեղահանված անձանց դեպքում հաղորդագրությունը ստանալուց հետո «070» կոդով անձնագիրը և ժամանակավոր պաշտպանության վկայականը ճանաչվում են անվավեր․ անհրաժեշտ է դիմել ՀՀ քաղաքացու անձնագիր ստանալու համար։ 

Հղում օրենսդրությանը

• «Պետական տուրքի մասին» ՀՀ օրենք
• «Հայաստանի Հանրապետության քաղաքացիության մասին» ՀՀ օրենք
• ՀՀ կառավարության 2007 թվականի նոյեմբերի 11-ի N 1390-Ն որոշում
• ՀՀ կառավարության 2007 թվականի հոկտեմբերի 4-ի N 154-Ն որոշում

Իրավական ակտերը հնարավոր է գտնել arlis.am-ում։