Այց ամրագրելիս անհրաժեշտ է նշել այն անձի տվյալները, ով անձամբ ներկայանալու է ընդունելության: Յուրաքանչյուր այցելուի համար անկախ տարիքից անհրաժեշտ է կատարել անհատական հերթագրում։

Առցանց հերթագրվելու համար անհրաժեշտ է՝

• նույնականացումից հետո «Դիմորդի էջ»-ում լրացնել պահանջվող տվյալները (անունն ու ազգանունն անհրաժեշտ է լրացնել հայատառ, ինչպես գրված է անձնագրում) և սեղմել «Հաջորդ էջ» կոճակը,

• բացվող էջի «Այցելության վայր» դաշտում ընտրել նախընտրելի բաժանմունքը կամ վարչությունը,

• ընտրել հասանելի օրերից ու ժամերից ամենահարմար տարբերակը։

Ուշադրություն 
Հերթագրման հայտը համարվում է ամրագրված, եթե դիմողը էլեկտրոնային հասցեին ստանում է այդ մասին համապատասխան հաղորդագրություն։ 

Պահանջվող փաստաթղթերը

Կախված այն հանգամանքից, թե ինչ հիմքով է անձը դիմում բնակության հասցեում հաշվառվելու համար, պահանջվող փաստաթղթերի ցանկը կարող է տարբերվել։

Սեփականության իրավունքի հիման վրա բնակության հասցեում գրանցվելիս

Սեփականության իրավունքի հիման վրա բնակության հասցեում հաշվառվելու դեպքում անհրաժեշտ է ներկայացնել հետևյալ փաստաթղթերը՝

ՀՀ քաղաքացի լինելու դեպքում՝

• անձնագիր,
• բնակարանի/տան սեփականության իրավունքի վկայական,
• պետական տուրքի վճարման անդորրագիրը։

Օտարերկրյա քաղաքացի լինելու դեպքում՝

• ՀՀ-ում օրինական բնակության իրավունքը հավաստող փաստաթուղթ, իսկ ՌԴ քաղաքացիների դեպքում՝ անձնագիր և դրա նոտարական կարգով վավերացմամբ թարգմանություն,
• բնակարանի/տան սեփականության իրավունքի վկայական,
• սեփականատիրոջ (համասեփականատերերի) համաձայնագիր,
• սեփականատիրոջ (համասեփականատերերի) անձը հաստատող փաստաթուղթ,
• պետական տուրքի վճարման անդորրագիրը։

Հարկ է նշել, որ և՛ ՀՀ քաղաքացու, և՛ օտարերկրացու կողմից հաշվառման դիմում ներկայացնելու դեպքում սեփականատիրոջ (համասեփականատերերի) կողմից անձամբ չներկայանալու պարագայում համաձայնությունը պետք է վավերացված լինի նոտարական կարգով։ 

Սեփականատերը նշված համաձայնությունը տալիս է անձամբ կամ նոտարական վավերացմամբ: Համաձայնության մեջ պետք է նշվեն այն անձանց տվյալները (անուն, ազգանուն, հայրանուն և ծննդյան օր, ամիս, ամսաթիվ), որոնց սեփականատերը ցանկանում է հաշվառել իր բնակելի տարածության հասցեում:

Այն դեպքում, երբ բնակելի տարածությունն ունի մի քանի սեփականատեր, ապա անձին հաշվառելու համար անհրաժեշտ է ներկայացնել բոլոր սեփականատերերի համաձայնությունը:

Վարձակալության պայմանագրի հիման վրա բնակության հասցեում գրանցվելիս

Անկախ քաղաքացիությունից՝ տվյալ տարածքում բնակվող անձինք հաշվառվելու համար պետք է ներկայացնեն՝

• անձնագիր (օտարերկրացու դեպքում՝ ՀՀ-ում օրինական բնակության իրավունքը հավաստող փաստաթուղթ, իսկ ՌԴ քաղաքացու կողմից դիմելու դեպքում՝ անձնագիր և դրա նոտարական վավերացմամբ հայերեն թարգմանությունը),
• ՀՀ Կադաստրի կոմիտեում օգտագործման իրավունքի գրանցված լինելը հավաստող փաստաթուղթ,
• պետական տուրքի վճարումը հավաստող փաստաթուղթ։

Տվյալ տարածքի սեփականատեր չլինելու և վարձակալության պայմանագիր չունենալու դեպքում գրանցվելիս

Անկախ քաղաքացիությունից՝ տվյալ տարածքում բնակվող անձինք հաշվառվելու համար պետք է ներկայանան այդ բնակելի տարածքի սեփականատիրոջ հետ՝ ներկայացնելով հետևյալ փաստաթղթերը՝

• իրենց և սեփականատիրոջ անձնագրերը (այլ երկրի անձնագրի դեպքում՝ նաև նոտարական վավերացմամբ հայերեն թարգմանությունը),
• բնակարանի սեփականության իրավունքի վկայականը, բնակարանի սեփականատիրոջ համաձայնությունը (համաձայնության ձևը հնարավոր է ներբեռնել այստեղ),
• սեփականատիրոջ բացակայության դեպքում՝ նրա կողմից տրված համաձայնությունը նոտարական հաստատմամբ,
• այլ սեփականատերերի առկայության դեպքում՝ նրանց ներկայությունը կամ տրված գրավոր համաձայնությունը՝ նոտարական կարգով վավերացված:
  
  

Փաստացի հասցեում բնակվելու պարագայում հաշվառվելիս անհրաժեշտ է ներկայացնել՝

• ՀՀ քաղաքացին՝ ՀՀ անձնագիր (առկայության դեպքում նաև նույնականացման քարտ),
• ՌԴ քաղաքացին՝ ՌԴ քաղաքացու անձնագիր և դրա նոտարական կարգով վավերացված հայերեն թարգմանությունը,
• օտարերկրացին՝ ՀՀ-ում օրինական բնակությունը հավաստող փաստաթուղթ,
• պետական տուրքի վճարումը հավաստող փաստաթուղթ։

Դիմումի մեջ նշված հասցեում բնակվելու փաստը ստուգվում է ոստիկանության կողմից՝ դիմումը ստանալուց հետո ոչ ուշ, քան 5 աշխատանքային օրվա ընթացքում: Դիմումի մեջ նշված հասցեում անձի բնակվելու փաստը ստուգելուց հետո նույն աշխատանքային օրը, բայց ոչ ուշ, քան հաջորդ աշխատանքային օրվա ժամը 10։00-ն, ոստիկանության կողմից Միգրացիացիայի և քաղաքացիության ծառայության ստորաբաժանում է ուղարկվում փաստացի բնակվելու փաստը հավաստող կամ հերքող տեղեկատվություն (տեղեկանք կամ գրություն):

Հաշվառումն իրականացվում է փաստացի բնակվելու փաստը հավաստող տեղեկատվությունը (տեղեկանքը կամ գրությունը) ստորաբաժանում ստացվելուց հետո 3 աշխատանքային օրվա ընթացքում: Փաստացի բնակվելու փաստը հերքող տեղեկատվություն (տեղեկանք կամ գրություն) ստանալուց հետո 3 աշխատանքային օրվա ընթացքում ստորաբաժանումը գրավոր մերժում է դիմումատուին:

Այն դեպքերում, երբ նախապես հայտնի է բնակելի տարածության սեփականատիրոջ առարկությունն իր բնակելի տարածության հասցեում դիմումատուին հաշվառելու վերաբերյալ, կամ դիմումատուն բնակվում է (գտնվում է) բնակելի տարածություն չհանդիսացող տարածքում, ապա ռեգիստրում կատարվում է նշում փաստացի բնակվելու (գտնվելու) վայրի մասին:

16-18 տարեկան անձը դիմումը ներկայացնում է անձամբ կամ լիազորված անձի միջոցով և կարող է հաշվառվել ծնողներից մեկի հաշվառման հասցեում։
 
Պահանջվող փաստաթղթերն են՝ 

●    անձը հաստատող փաստաթուղթ (դիմումատուի անձնագիր, ծննդյան վկայական), 
●    ծնողի (ծնողների) անձը հաստատող փաստաթուղթ, 
●    պետական տուրքի վճարումը հավաստող փաստաթուղթ

Մինչև 16 տարեկան անձի գրանցման դեպքում

Մինչև 16 տարեկան անձի դեպքում ծնողներից մեկը (օրինական ներկայացուցիչը կամ լիազորված անձը) դիմում է ներկայացնում նրանցից որևէ մեկի մշտական բնակության վայրում երեխային հաշվառելու համար, որի համար ներկայացնում են․ 

• ծնողների անձնագրերը, 
• երեխայի ծննդյան վկայականը, առկայության դեպքում՝ նաև անձնագիրը
• անձը հաստատող փաստաթուղթ (օրինական ներկայացուցչի կամ լիազորված անձի կողմից ներկայացվելու դեպքում)։

16-18 տարեկան անձը դիմում է և կարող է հաշվառվել նաև ծնողներից մեկի հաշվառման հասցեում, եթե ծնողը տվյալ հասցեում հաշվառված է մշտական հիմունքներով:

Վճարման չափը և կարգը

Բնակության հասցեում հաշվառվելու համար անհրաժեշտ է վճարել 1,000 դրամ։

Վճարումն իրականացվում է հետևյալ եղանակներից մեկով՝

• E-payments համակարգի միջոցով,
• բանկային փոխանցման միջոցով ՀՀ պետական բյուջեի հաշվեհամարին՝ 900005162111 (եթե
• բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը),
• վճարային տերմինալի միջոցով կամ առցանց եղանակով։

Մինչև  16 տարեկան ՀՀ քաղաքացու հաշվառման դեպքում պետական տուրք չի գանձվում, իսկ օտարերկրացիների պարագայում անհրաժեշտ է ներկայացնել պետական տուրքի վճարումը հավաստող փաստաթուղթ։ 

16 տարին լրացած ՀՀ քաղաքացի արական սեռի զինապարտների հաշվառումը իրականացվում է տվյալ հասցեի զինվորական կոմիսարիատում՝ զինվորական հաշվառման կանգնելուց հետո։ 

Ուշադրություն 

Եթե անձի տվյալները ՀՀ բնակչության պետական ռեգիստրում բացակայում են՝ 1981 թվականի նոյեմբերի 28-ից հետո ծնված դիմումատուները հաշվառվելիս պետք է ներկայացնեն նաև ծնողների անձը հաստատող փաստաթղթերը, ծնողների ամուսնության վկայականը (բացակայության դեպքում՝ հայրության ճանաչման վկայականը կամ միայնակ մայր հանդիսանալու վերաբերյալ տեղեկանքը կամ մահվան վկայականը)։

Տրամադրման ժամկետը

Բնակության վայրում հաշվառումն իրականացվում է մշտական հիմունքներով 3 աշխատանքային օրվա, իսկ փաստացի հիմունքերով՝ 8 աշխատանքային օրվա ընթացքում։

Հղում օրենսդրությանը

• «Բնակչության պետական ռեգիստրի մասին» ՀՀ օրենք
• «Հայաստանի Հանրապետության քաղաքացիության մասին» ՀՀ օրենք
• «Օտարերկրացիների մասին» ՀՀ օրենք
• «Պետական տուրքի մասին» ՀՀ օրենք
• ՀՀ կառավարության՝ 2005 թվականի հուլիսի 14-ի N 1231-Ն որոշում
• ՀՀ կառավարության՝ 2007 թվականի հոկտեմբերի 10-ի N 1154-Ն որոշում

Իրավական ակտերը հնարավոր է գտնել arlis.am-ում։