Այց ամրագրելիս անհրաժեշտ է նշել այն անձի տվյալները, ով անձամբ ներկայանալու է ընդունելության: Յուրաքանչյուր այցելուի համար անկախ տարիքից անհրաժեշտ է կատարել անհատական հերթագրում։

Մինչև 16 տարեկան քաղաքացու անձնագիրը փոխանակելու դիմումը ներկայացնում է երեխայի ծնողը կամ օրինական ներկայացուցիչը (որդեգրողը, խնամակալը,հոգաբարձուն կամ լիազորված անձը)։ Ընդ որում՝ եթե ծնողը կամ օրինական ներկայացուցիչն անձամբ չի կարող ներկայացնել դիմումը, ապա ներկայացվող դիմումի վրա նրա ստորագրության իսկությունը պետք է վավերացված լինի նոտարական կարգով։ Դիմումը պետք է պարունակի երեխային անձնագիր տրամադրելու գործողության վերաբերյալ հստակ նշում, ինչպես նաև անձնագիր ստացող երեխայի անձնական տվյալները (անուն, ազգանուն, ծննդյան օր, ամիս, տարեթիվ):

Առցանց հերթագրվելու համար անհրաժեշտ է՝

• 16 տարեկանից բարձր անձանց անձնագրի փոխանակման դեպքում ընտրել «16 տարեկանից բարձր ՀՀ քաղաքացու անձնագրավորում» բաժինը, իսկ մինչև 16 տարեկան անձանց անձնագրի փոխանակման դեպքում՝ «Մինչև 16 տարեկան ՀՀ քաղաքացու անձնագրավորում» բաժինը,
• նույնականացումից հետո լրացնել պահանջվող տվյալները (անունն ու ազգանունն անհրաժեշտ է լրացնել հայատառ, ինչպես գրված է անձնագրում) և սեղմել «Հաջորդ էջ» կոճակը,
• բացվող էջում մուտքագրել էլ․ փոստի հասցեն և հեռախոսահամարը, այնուհետև՝ էլ․ փոստին ուղարկված կոդը,
• բացվող էջի «Այցի ամրագրում» դաշտում ընտրել Դավթաշեն, 4-րդ թաղամաս, 17/10 հասցեում գործող բաժանմունքը,
• անհրաժեշտ է լրացնել այն անձի տվյալները, ում համար ներկայացվում է դիմումը,
• «Ընտրել օր և ժամ» պատուհանում ընտրել հասանելի օրերից ու ժամերից ամենահարմար տարբերակը։

Ներկայացվող պահանջները

ՀՀ քաղաքացու անձնագիրը փոխանակելու համար անհրաժեշտ է՝

• գրանցված լինել Բնակչության պետական ռեգիստրում։

Անձնագիրը փոխանակվում է, եթե․

• վավերականության ժամկետը լրացել է,
• քաղաքացին կորցրել է անձնագիրը,
• անձնագրում առկա են ոչ ճիշտ տվյալներ և քաղաքացին ցանկանում է փոխել դրանք (անհրաժեշտ է ներկայացնել նաև տվյալի փոփոխությունը հավաստող փաստաթղթերը),
• լրացել են մուտքի վիզաները փակցնելու համար նախատեսված անձնագրի էջերը,
• քաղաքացին նման ցանկություն է հայտնել։

Պահանջվող փաստաթղթերը

Անձնագիրը փոխանակելու համար անհրաժեշտ է ներկայացնել՝

• փոխանակվող անձնագիրը (բացառությամբ այն դեպքերի, երբ անձնագիրը կորել է),

• 35 x 45 մմ չափսի երկու գունավոր լուսանկար,

• պահանջվող փաստաթղթերն օտար լեզվով կազմված լինելու դեպքում դրանց՝ օրենքով սահմանված կարգով կատարված և վավերացված հայերեն թարգմանությունները,

• հնարավորության դեպքում՝ նաև փաստաթղթերի լուսապատճենները։

Անձնագրում տվյալները փոփոխված կամ ոչ ճիշտ լինելու դեպքում անհրաժեշտ է ներկայացնել նաև՝

• իրավասու մարմնի կողմից տրված՝ փոփոխությունը կամ անճշտությունը հավաստող փաստաթուղթը։

Զինապարտ քաղաքացիները (16-55 տարեկան արական սեռի քաղաքացիներ) պետք է ներկայացնեն նաև՝

• զինվորական գրքույկը կամ դրա բացակայության դեպքում տեղեկանք տարածքային զինկոմիսարիատի կողմից։

Վճարման չափը և կարգը

• Անձնագիրը փոխանակելու համար անհրաժեշտ է վճարել 1,000 ՀՀ դրամ։
• Կորցնելու դեպքում նոր անձնագիր ստանալու համար անհրաժեշտ է վճարել 1,000 ՀՀ դրամ։

Վճարումն իրականացվում է հետևյալ եղանակներից մեկով՝

• E-payments համակարգի միջոցով,
• բանկային փոխանցման միջոցով ՀՀ պետական բյուջեի հաշվեհամարին՝ 900005162152 (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը),
• բաժանմունքում տեղադրված վճարային տերմինալով։

Նախապես վճարելու դեպքում վճարման անդորրագիրն անհրաժեշտ է ներկայացնել թղթային տարբերակով, քանի որ այն կցվելու է քաղաքացու փաստաթղթերին։

Տրամադրման ժամկետը և կարգը

Անձնագիրը տրամադրվում է դիմելուց հետո 5-րդ աշխատանքային օրը, իսկ կորցնելու դեպքում՝ դիմելուց հետո 10-րդ աշխատանքային օրը։

Նոր անձնագիրը ստանալու համար անհրաժեշտ է այցելել այն անձնագրային բաժանմունք, որտեղ անձը դիմել է այն փոխանակելու համար։

Հնարավոր է նաև անձնագիրն ավելի շուտ ստանալ։ Այս դեպքում վճարումը հնարավոր է կատարել միայն անձնագրային բաժանմունքում՝ վճարային տերմինալի միջոցով։

Փոխանակելու դեպքում՝ 

• 1,000+10,000 ՀՀ դրամ՝ անձնագիրը 3-րդ աշխատանքային օրը ստանալու համար,

• 1,000+20,000 ՀՀ դրամ՝ անձնագիրը 1 աշխատանքային օրվա ընթացքում ստանալու համար։

Կորցնելու դեպքում՝

• 1,000+40,000 ՀՀ դրամ՝ անձնագիրը 5-րդ աշխատանքային օրը ստանալու համար,

• 1,000+50,000 ՀՀ դրամ՝ անձնագիրը 3-րդ աշխատանքային օրը ստանալու համար,

• 1,000+60,000 ՀՀ դրամ՝ անձնագիրը 1 աշխատանքային օրվա ընթացքում ստանալու համար։

Հղում օրենսդրությանը