Այց ամրագրելիս անհրաժեշտ է նշել այն անձի տվյալները, ով անձամբ ներկայանալու է ընդունելության: Յուրաքանչյուր այցելուի համար անկախ տարիքից անհրաժեշտ է կատարել անհատական հերթագրում։ Ընդ որում՝ 75 տարեկանից բարձր անձանց սպասարկումը իրականացվում է «կենդանի հերթ» ձևաչափով: 

Առցանց հերթագրվելու համար անհրաժեշտ է՝

• նույնականացումից հետո լրացնել պահանջվող տվյալները (անունն ու ազգանունն անհրաժեշտ է լրացնել հայատառ, ինչպես գրված է անձնագրում) և սեղմել «Հաջորդ էջ» կոճակը,
• բացվող էջում մուտքագրել էլ․ փոստի հասցեն և հեռախոսահամարը, այնուհետև՝ էլ․ փոստին ուղարկված կոդը,
• բացվող էջի «Այցի ամրագրում» դաշտում ընտրել ՆԳՆ ՄՔԾ այն ստորաբաժանումը, որտեղ անձը ցանկանում է սպասարկվել (անհրաժեշտ է լրացնել այն անձի տվյալները, ով ներկայացնելու է դիմումը),
• «Ընտրել օր և ժամ» պատուհանում ընտրել հասանելի օրերից ու ժամերից ամենահարմար տարբերակը։ 

Ներկայացվող պահանջները

Անձնագիր ստանալու համար անհրաժեշտ է՝

• գրանցված լինել Բնակչության պետական ռեգիստրում։

Պահանջվող փաստաթղթերը

16 տարին լրացած քաղաքացու անձնագիր ստանալու կամ փոխանակելու համար անհրաժեշտ է ներկայացնել՝

• նույնականացման քարտ կամ մինչև 16 տարին լրանալը ստացած անձնագիր կամ ծննդյան վկայական,

• 35 x 45 մմ չափսի երկու գունավոր լուսանկար,

• առաջին անգամ անձնագրով փաստաթղթավորվելիս անհրաժեշտ է ներկայացնել նաև ծնողների ամուսնության (կամ մահվան, հայրության ճանաչման վկայականները, կամ միայնակ մայր լինելու վերաբերյալ տեղեկանք, կամ անհայտ բացակայող, կամ մահացած ճանաչվելու վերաբերյալ դատարանի՝ օրինական ուժի մեջ մտած վճիռը), ծնողների անձը հաստատող փաստաթղթերը (կամ դրանց պատճենները)։ Պահանջվող փաստաթղթերն օտար լեզվով կազմված լինելու դեպքում՝ դրանց օրենքով սահմանված կարգով կատարված և վավերացված հայերեն թարգմանությունները։ 

Արական սեռի քաղաքացիների զինապարտ լինելու դեպքում անհրաժեշտ է ներկայացնել նաև՝

• զինվորական գրքույկ, կցագրման վկայական կամ զինվորական կոմիսարիատի կողմից տրված համապատասխան տեղեկանք։

16-18 տարեկան քաղաքացիները նույնականացման քարտ կամ անձնագիր չունենալու դեպքում պետք է ներկայացնեն նաև՝

• իր և ծնողների գրավոր համաձայնությունն անձնագիր ստանալու վերաբերյալ, եթե ծնողներից մեկն օտարերկրյա քաղաքացի է։

Վճարման չափը և կարգը

Անձնագիրը ստանալու համար անհրաժեշտ է վճարել 1,000 դրամ։

Վճարումն իրականացվում է հետևյալ եղանակներից մեկով՝ 

• E-payments համակարգի միջոցով,
• բաժանմունքում տեղադրված վճարային տերմինալով
• բանկային փոխանցման միջոցով ՀՀ պետական բյուջեի հաշվեհամարին՝ 900005162152 (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը)։

Նախապես վճարելու դեպքում վճարման անդորրագիրն անհրաժեշտ է ներկայացնել թղթային տարբերակով, քանի որ այն կցվելու է քաղաքացու փաստաթղթերին (էլեկտրոնային եղանակով ներկայացված անդորրագրերը չեն ընդունվում)։

Տրամադրման ժամկետը և կարգը

• Անձնագիրը տրամադրվում է 5 աշխատանքային օրվանից հետո։ Այն ստանալու համար անհրաժեշտ է այցելել այն անձնագրային բաժանմունք, որտեղ անձը դիմել է անձնագիր ձեռք բերելու համար։
• Կորցրած անձնագրի փոխարեն նոր անձնագիրը տրամադրվում է դիմումը հանձնելուն հաջորդող 10-րդ աշխատանքային օրը։
  
  

Հնարավոր է նաև անձնագիրն ավելի շուտ ստանալ։ 

Անձնագիրն ավելի շուտ ստանալու նպատակով վճարումների չափն ու տրամադրման ժամկետներն են՝ 

• 1,000+10,000 ՀՀ դրամ՝ անձնագիրը 3 աշխատանքային օրվանից հետո ստանալու համար,
• 1,000+20,000 ՀՀ դրամ՝ անձնագիրը 1 աշխատանքային օրվանից հետո ստանալու համար։

Կորցրած անձնագրի փոխարեն նոր անձնագիրն առավել սեղմ ժամկետում ստանալու համար սահմանված են հետևյալ արժեքները՝ 

• 1,000+40,000 ՀՀ դրամ՝ անձնագիրը 5 աշխատանքային օրվանից հետո ստանալու համար,

• 1,000+50,000 ՀՀ դրամ՝ անձնագիրը 3 աշխատանքային օրվանից հետո ստանալու համար,

• 1,000+60,000 ՀՀ դրամ՝ անձնագիրը 1 աշխատանքային օրվա ընթացքում ստանալու համար։

Այս դեպքերում վճարումը հնարավոր է կատարել միայն անձնագրային բաժանմունքում՝ վճարային տերմինալի միջոցով։

Ընդ որում՝ ՀՀ տարածքից դուրս գալու դեպքում ելքի վիզայի անհրաժեշտություն չկա (անձնագրում դրվող կլոր կնիք)։

Հղում օրենսդրությանը

• «ՀՀ քաղաքացու անձնագրի մասին» ՀՀ օրենք
• «Պետական տուրքի մասին» ՀՀ օրենք

Իրավական ակտերը հնարավոր է գտնել arlis.am-ում։