«Շարունակել» կոճակը սեղմելուց և նույնականացում անցնելուց հետո անհրաժեշտ է.

• մուտք գործել հարթակ և ընտրել օգտատիրոջ տեսակը,
• էկրանի ձախ անկյունում ընտրել «Միասնական հայտ» դաշտը,
• ընտրել համապատասխան գործարքը (ներմուծում կամ արտահանում),
• կատարել հաջորդական քայլերը և լրացնել դաշտերը։
  
  

Պահանջվող փաստաթղթերը

Լիցենզիա ստանալու համար անհրաժեշտ է ներկայացնել հետևյալ փաստաթղթերը՝

• պետական գրանցման վկայականի համարը, ֆիզիկական անձի դեպքում՝  անհատ ձեռնարկատիրոջ պետական հաշվառման համարը (անհատ ձեռնարկատեր հանդիսացող անձի դեպքում նաև ԱՁ-ի պետական գրանցման վկայականի պատճենը),

• լիցենզավորման ենթակա գործունեության իրականացման լիցենզիայի պատճենը, եթե գործունեության այդ տեսակը կապված է տվյալ ապրանքի շրջանառության հետ,

• պետական տուրքի վճարման անդորրագրի պատճենը կամ պետական վճարումների էլեկտրոնային անդորրագիրը,

• պետական մարմնի համաձայնությունը, որի տարածք ներմուծվում են թափոնները` ըստ Բազելի կոնվենցիայի (Եվրասիական տնտեսական միության մաքսային տարածքից թափոնների արտահանման դեպքում),

• ապրանք արտահանողի և ներմուծողի միջև պայմանագրի պատճենը, այն դեպքում, երբ հայտատուն հանդես է գալիս որպես միջնորդ,

• փոխադրման պայմանագրի պատճենը և արտահանողի ու թափոնների հեռացման համար պատասխանատու անձի միջև պայմանագրի պատճենը, որում առկա է այդ թափոնների էկոլոգիապես անվտանգ օգտագործման մասին տեղեկատվություն,

• Բազելի կոնվենցիայի պահանջներին համապատախան թափոնների անդրսահմանային փոխադրման մասին ծանուցում,

• Բազելի կոնվենցիայի պահանջներին համապատախան թափոնների փոխադրման մասին փաստաթուղթ,

• վտանգավոր թափոնների օգտագործման համար տեղեկատվություն տեխնիկական հնարավորությունների առկայության մասին (քաղվածք վտանգավոր թափոնները որպես հումք օգտագործելու հնարավորությունը հաստատող տեխնոլոգիական կանոնակարգից կամ այլ փաստաթուղթ, որը հաստատում է դրանց օգտագործման հնարավորությունն առանց այլ վտանգավոր թափոնների կամ դրանց մնացորդների առաջացման)։

Ծառայության մատուցումը չհաստատելու հիմքերը

Հայտը չի հաստատվում, եթե՝

• բացակայում են անհրաժեշտ փաստաթղթերը կամ դրանցում ներկայացված տեղեկությունները չեն համապատասխանում իրականությանը,

• լիցենզիայի տրամադրման համար հիմք ծառայող մեկ կամ մի քանի փաստաթղթերի գործողությունը դադարեցված է կամ կասեցված,

• քվոտան, ինչպես նաև սակագնային քվոտան սպառվել է:
  
  

Վճարման կարգը և չափը

Վտանգավոր թափոնների գործածության լիցենզիայի յուրաքանչյուր ներդիրի համար անհրաժեշտ է վճարել տարեկան 40,000 դրամ։

Տրամադրման ժամկետը և կարգը

Լիցենզիան տրվում է ՀՀ Շրջակա միջավայրի նախարարության կողմից հայտ ներկայացնելուց հետո 1 աշխատանքային օրվա ընթացքում։

Մեկանգամյա լիցենզիան տրամադրվում է առավելագույնը 1 տարի ժամկետով՝ դրա գործելու օրվանից սկսած։ Լիցենզիայի ժամկետը կարող է սահմանափակվել արտաքին առևտրային պայմանագրի գործողության ժամկետով, իսկ եթե պայմանագիր չկա՝ այն փաստաթղթի ժամկետով, որը հաստատում է կողմերի մտադրությունները կամ հանդիսանում է լիցենզիայի տրամադրման հիմք։

Հղում օրենսդրությանը

• ՀՀ կառավարության՝ 2014 թվականի դեկտեմբերի 25-ի N 1524-Ն որոշում

• ՀՀ կառավարության՝ 2015 թվականի փետրվարի 5-ի N 90-Ն որոշում

Իրավական ակտերը հնարավոր է գտնել arlis.am-ում (անհրաժեշտ է կարդալ ակտերի վերջին տարբերակները):