Զինծառայողի զոհվելու (մահանալու) կամ անհայտ բացակայող ճանաչվելու դեպքում շահառու են համարվում․

• զինծառայողի ամուսինը, զավակը/զավակները, ծնողը/ծնողները, հատուցման դեպքը տեղի ունենալու օրվա դրությամբ՝ 18 տարին չլրացած կամ անգործունակ ճանաչված կամ մինչև 23 տարեկան առկա ցերեկային ուսուցմամբ սովորող ուսանող քույրը և եղբայրը, ինչպես նաև զինծառայողի խնամքի տակ գտնված 18 տարեկան և դրանից բարձր տարիքի հաշմանդամ քույրը և եղբայրը, եթե հաշմանդամ են ճանաչվել մինչև 18 տարին լրանալը: Ընդ որում, քույրը և եղբայրը համարվում են շահառու, եթե նրանց ծնողները կամ միակ ծնողը մահացած են կամ ունեն աշխատանքային գործունեությամբ զբաղվելու կարողության առնվազն երրորդ աստիճանի սահմանափակում,
• զինծառայողի հետ գրանցված ամուսնության մեջ չգտնվող և համատեղ զավակ ունեցող անձը,
• վերոնշյալ կետերում սահմանված շահառուների բացակայության դեպքում շահառու է համարվում հատուցման դեպքը տեղի ունենալու օրվա դրությամբ այն անձը, ով եղել է զինծառայողի խնամքի տակ և ունեցել է հաշմանդամություն կամ աշխատանքային կենսաթոշակի իրավունք. խնամել է զինծառայողին մինչև նրա 18 տարին լրանալը:
• վերոնշյալ բոլոր շահառուների բացակայության դեպքում շահառու են համարվում նաև զինծառայողի եղբայրը և քույրը, եթե տվյալ զինծառայողների մասով նախկինում որևէ այլ շահառու գումար չի ստացել:

Դիմումները ներկայացվում են հետևյալ պետական մարմիններից մեկի՝ սոցիալական ապահովության բաժին.

• Պաշտպանության նախարարություն,
• Ներքին գործերի նախարարություն,
• Ազգային անվտանգության ծառայություն,
• Պետական պահպանության ծառայություն:

Ուշադրություն

• Պետք է դիմել այն պետական մարմին, որտեղի աշխատակից է եղել զինծառայողը։
• Կամավորագրված անձիք դիմում են միայն Պաշտպանության նախարարություն։

ԶԻՆԱՊԱՀԻ շահառու համարվելու համար համապատասխան պետական մարմին դիմումին (տրամադրվում է տեղում) կից ներկայացվում են հետևյալ փաստաթղթերը․

• զինծառայողին հաշմանդամ ճանաչելու մասին տեղեկանքն ու ստացած վնասվածքի կամ խեղման պատճառական կապի մասին համապատասխան պետական մարմնի կենտրոնական ռազմաբժշկական հանձնաժողովի որոշումը.
• մահվան պատճառական կապի մասին բժշկասոցիալական փորձաքննություն իրականացնող իրավասու պետական մարմնի տված տեղեկանքը` մարտական գործողությունների ժամանակ ստացած վնասվածքի կամ խեղման պատճառով զինծառայողի մահացած լինելու վերաբերյալ.
• զինծառայողին անհայտ բացակայող ճանաչվելու վերաբերյալ դատական ակտը.
• հաշմանդամություն ունեցող զինծառայողի կամ օրենքով սահմանված շահառու հանդիսացող անձանց անձնագրերը (կամ նույնականացման քարտը).
• օրենքով սահմանված շահառու հանդիսանալու հանգամանքը հաստատող այլ փաստաթղթեր` ամուսնության (ամուսնալուծության), ծննդյան կամ մահվան վկայականները, դատական ակտերը, տեղեկանքները և այլն։

Ընդ որում, դիմումը ստորագրում է շահառուն անձամբ կամ շահառուի լիազորած անձը՝ լիազորագրի առկայության դեպքում։

• Համապատասխան պետական մարմինը մեկամսյա ժամկետում որոշում է տվյալ դեպքով շահառուների շրջանակը, վճարման ենթակա գումարները և հատուցման դեպքի վերաբերյալ տեղեկությունները և շահառուների անվանացանկը  ներկայացնում է ԶԻՆԱՊԱՀԻՆ՝ վճարում կատարելու համար։
• ԶԻՆԱՊԱՀԸ ստացված փաստաթղթերում (տեղեկություններում) թերություններ և (կամ) անճշտություններ հայտնաբերելու դեպքում 2 աշխատանքային օրվա ընթացքում դրա մասին տեղեկացնում է համապատասխան պետական մարմնի սոցիալական ապահովության խնդիրներ իրականացնող ստորաբաժանմանը` նշելով հայտնաբերված թերությունները և (կամ) անճշտությունները: 
• Համապատասխան պետական մարմնի սոցիալական ապահովության խնդիրներ իրականացնող ստորաբաժանումը պարտավոր է 
  տեղեկատվությունը ստանալուց հետո 3 աշխատանքային օրվա ընթացքում վերացնել թերությունները և (կամ) անճշտությունները և համապատասխան փաստաթղթերը (տեղեկությունները) ներկայացնել հիմնադրամ:  
• Այն դեպքում, երբ դիմում փաթեթն ամբողջական է և առանց թերությունների, ԶԻՆԱՊԱՀԸ գործընկեր բանկերում շահառուների անվամբ բացում է բանկային հատուկ հաշիվներ և միանվագ գումարը, ինչպես նաև ամսական հատուցման առաջին վճարման գումարը փոխանցում է այդ հաշիվներին:

1-ին և 2-րդ խմբի զինհաշմանդամություն կամ ֆունկցիոնալության խորը և ծանր սահմանափակում ունեցող Զինծառայողը և զոհված (մահացած) կամ անհայտ բացակայող ճանաչված զինծառայողի ընտանիքի անդամներն ունեն լրացուցիչ ամսական 126,000 դրամ (100,000 դրամ օրենքով + 26,0000 դրամ ինդեքասավորումից) ստանալու իրավունք, եթե զինծառայողն ունի․

• 18 տարին չլրացած 3 կամ ավելի երեխաներ,
• 23 տարին չլրացած առկա ցերեկային ուսուցմամբ սովորող 3 կամ ավելի զավակներ,
• 3 կամ ավելի երեխաներ 18 տարեկան կամ դրանից բարձր տարիքի հաշմանդամ զավակներ, եթե հաշմանդամ են ճանաչվել մինչև 18 տարին լրանալը։

Հոգաբարձուների խորհրդի որոշմամբ ԶԻՆԱՊԱՀԸ ամսական 100,000 դրամի չափով դրամական աջակցություն է վճարում ԶԻՆԱՊԱՀԻ շահառուներին, եթե․ 

• շահառուն հանդիսանում է զոհված (մահացած) կամ անհայտ բացակայող ճանաչված զինծառայողի՝ մանկուց (մինչև 18 տարեկանը) ձեռք բերված հիվանդության պատճառով հաշմանդամ ճանաչված երեխա (զավակ),
• շահառուն հանդիսանում է 1-ին կամ 2-րդ խմբի հաշմանդամություն ունեցող զինծառայող և ունի մանկուց (մինչև 18 տարեկանը) ձեռք բերված հիվանդության պատճառով հաշմանդամ ճանաչված երեխա (զավակ):

Դրոշմանիշային վճարի վերադարձի համար անհրաժեշտ է առցանց կամ փոստով դիմել ԶԻՆԱՊԱՀ հատուցման հիմնադրամ՝ ներկայցնելով պահանջվող փաստաթղթերը։ 

Դիմումին կից՝ պետք է ներկայացնել հետևյալ փաստաթղթերը.

• անձնագրի կամ նույնականացման քարտ,
• եթե դիմումատուն ամուսինն է՝ ամուսնության վկայական,
• եթե դիմումատուն ծնողն է կամ զավակը՝ ծննդյան վկայական,
• եթե դիմումատուն ծնողն է՝ զինծառայողի ծննդյան վկայական,
• զինծառայողի կարգավիճակը հաստատող փաստաթղթեր՝ զինվորական գրքույկ կամ տեղեկանք զինծառայության մասին, այն գերատեսչության սոցիալական ծառայության բաժնի կողմից, որտեղ ծառայել և ծառայում է զինծառոյողը,
• զինծառայողի մահվան դեպքում՝ մահվան վկայական,
• մահվան մասին տեղեկանք, որը տրամադրվում է այն գերատեսչության սոցիալական ապահովության բաժնի կողմից, որտեղ ծառայել է զինծառայողը,
• տեղեկանք, որտեղ նշված է, թե որ ամիսների համար ես վճարել դրոշմանիշային վճար (տրամադրում է հարկային ծառայությունը),
• բանկային հաշվի տվյալներ, որին կփոխանցվի գումարը:

Ուշադրություն

Եթե դու արդեն հատուցման հիմնադրամի շահառու ես (օրինակ՝ ստանում ես ֆինասնական աջակցություն), ապա ընտանեկան կապը հաստատող փաստաթղթեր՝ ամուսնության և ծննդյան վկայկան ներկայացնելու կարիք չկա:

Հիմնադրամը ստուգում է բոլոր տվյալները, և մինչև 2 ամսվա ընթացքում գումարը փոխանցվում է քո բանկային հաշվին, որը ստուգվում է ՀՀ կենտրոնական բանկի միջոցով։

Եթե հետո պարզվի, որ ավելի մեծ գումար ես վճարել, քան վերադարձվել է, ապա կվճարվի նաև տարբերությունը։

Ո՛չ, յուրաքանչյուր տարի կարող եք դիմել նախորդող հաշվետու տարվա ընթացքում վճարած դրոշմանիշային վճարի գումարները վերադարձնելու համար։

Եթե փաստաթղթերում նկատվի թերություն կամ սխալ, ապա հիմադրամը քեզ կտեղեկացնի դրա մասին, և դու հնարավորություն կունենաս կատարել համապատասխան ուղղումներն ու կրկին ներկայացնել փաստաթղթերը։