Եթե գործող մեկ տարվա ընթացքում սպառես քո բոլոր 9 բալերը, ապա 6 ամսով կզրկվես ավտոմեքենա վարելու իրավունքից, ինչից հետո քեզ կրկին կտրվի 9 բալ։ 

Այս դեպքում դու կարող ես նշված ժամկետից շուտ վերադարձնել քո վարորդական իրավունքը․ դրա համար անհրաժեշտ է վարորդական իրավունքից զրկվելուց ոչ շուտ, քան 3 ամիս անց որակավորման տեսական քննություն հանձնել։

Եթե նույն տարում երկրորդ անգամ սպառես 9 բալը, ապա 1 տարով կզրկվես քո վարորդական իրավունքից, ինչից հետո ստիպված կլինես հանձնել տեսական և գործնական քննություններ և կրկին ստանալ վարորդական իրավունք։ 

Եթե քո հաշվին քիչ բալեր են մնացել, ապա կարող ես տարվա ընթացքում մեկ անգամ համալրել դրանք` հանձնելով տեսական քննություն և ստանալով 2 «բոնուսային» միավոր։

Եթե ավտոմեքենայի սեփականատերն ես, սակայն իրավախախտումը կատարել է մեկ այլ անձ, ով տվյալ պահին վարել է քո ավտոմեքենան, ապա իրավախախտման բալերը կհանվեն ոչ թե փաստացի վարորդի միավորներից, այլ քո, քանի որ ավտոմեքենայի սեփականատերը դու ես։

Նման խնդրից խուսափելու համար պարզապես անհրաժեշտ է roadpolice.am առցանց համակարգում վարորդին կցել ավտոմեքենային, և բալերը կպակասեն տվյալ վարորդի միավորներից։

Կկորցնես 0,5 բալ, եթե.

• ավտոմեքենան վարես անընթեռնելի համարանիշով, 

• խախտես կանգառի և կայանման կանոնները,

• քո սխալ կայանման կամ կանգառի պատճառով մեքենադ տարհանվի պահպանվող հատուկ տարածք։

Կկորցնես 1 բալ, եթե․ 

• վարելիս ծխես,

• խախտես խաչմերուկներում անցման կանոնները,

• խախտես հետիոտնային անցումների հատման կանոնները,

• խախտես վազանցի կանոնները,

• խախտես մանևր կատարելու կամ հետընթաց վարման կանոնները,

• խախտես արտաքին լուսային սարքերից օգտվելու կանոնները,
• հեռահար լույսերն արգելված դեպքերում կիրառես,
• հետիոտնային անցումում կանգ առնես կամ կայանես,

• անվտանգության գոտին չամրակապես,

• անցնես հետիոտնային գիծը։

Կկորցնես 1․5 բալ, եթե․

• ամրագոտիները չամրակապես,
• վարելիս հեռախոսով խոսես,
• տաքսի կամ հասարակական տրանսպորտ վարելիս ծխես։

Կկորցնես 2 բալ, եթե․

• թույլատրելի առավելագույն արագությունը գերազանցես 11–30 կմ/ժ–ով,

• համարանիշի առնվազն մեկ նիշը փակես,

• ճանապարհային երթևեկության անվտանգության ապահովման կարգը խախտես և առաջացնես վթարային իրադրություն,

• մեքենան վարես լուսացույցի կարմիր կամ դեղին ազդանշանների դեպքում,

• լուսացույցի կամ կարգավորողի արգելող ազդանշանին չենթարկվես։ 
  

Կկորցնես 3 բալ, եթե․

• եթե խախտես ապակիների թափանցելիության կանոնները, և խախտումդ մեկ անգամ արձանագրվելուց հետո կրկին արձանագրվի,

• ավտոմեքենայի համարանիշն այլ անձի հանձնես,

• միակողմանի երթևեկությամբ ճանապարհով տրանսպորտային միջոցների հոսքին հակառակ, այդ թվում` հետընթաց վարես,

• ճանապարհի բաժանարար գոտին չնախատեսված վայրերում հատես ձախ շրջադարձ կամ հետադարձ կատարելու դեպքում,

• թույլատրելի առավելագույն արագությունը գերազանցես 31–50 կմ/ժ–ով։ 

Կկորցնես 4 բալ, եթե․

• հանդիպակաց երթևեկության գոտի դուրս գաս,

• թույլատրելի առավելագույն արագությունը գերազանցես 51–80 կմ/ժ–ով։

Կկորցնես 5 բալ, եթե․

• մեքենան վարես ոչ սթափ վիճակում։

Վարորդական իրավունքից զրկվելու համար պատճառ կարող են լինել՝

• ոչ սթափ վիճակում ավտոմեքենա վարելը, ալկոթեսթ հանձնելուց հրաժարվելը,

• առանց թույլտվության ավտոմեքենայի վրա կարմիր և/կամ կապույտ փարոսիկների և հատուկ ձայնային ազդանշանների տեղադրումը,

• առանց համարանիշի ավտոմեքենա վարելը, 

• վարորդական իրավունքից զրկվելու դեպքում կամ առանց վարորդական իրավունքի մեքենա վարելը,

• ճանապարհային ոստիկանության տեսուչի` ավտոմեքենան կանգնեցնելու պահանջը չկատարելը, 

• թույլատրելի առավելագույն արագությունը գերազանցելը 81կմ/ժամով և ավելի