Ծառայությունից հնարավոր է օգտվել ֆիզիկապես՝ նախապես այց ամրագրելով։
Տեղեկանքի տեսքով հանրային ծառայությունների համարանիշ (ՀԾՀ) տրվում է ՀՀ քաղաքացուն, եթե նա չունի սոցիալական քարտ կամ հանրային ծառայությունների համարանիշ կամ ունի նույնականացման քարտ, որում ՀԾՀ ամրագրված չէ։
«Ամրագրել այց» կոճակը սեղմելուց հետո անհրաժեշտ է՝
- բացվող էջում մուտքագրել էլ․ փոստի հասցեն և հեռախոսահամարը, այնուհետև՝ էլ․ փոստին ուղարկված կոդը, սեղմել «Հաջորդ էջ» կոճակը,
- բացված էջում ընտրել ցանկալի մարզը կամ համայնքը, ապա «Այցելության վայր» դաշտում ընտրել առաջարկվող տարբերակներից մեկը,
- լրացնել պահանջվող անձնական տվյալները (անունն ու ազգանունն անհրաժեշտ է լրացնել ինչպես գրված է անձնագրում),
- «Ընտրել օր և ժամ» պատուհանում ընտրել հասանելի օրերից ու ժամերից ամենահարմար տարբերակը։
Տեղեկանքի տեսքով ՀԾՀ տրամադրվում է նաև 16 տարին չլրացած երեխային՝ ծնողի կամ օրինական ներկայացուցչի (հոգաբարձու, խնամակալ) ցանկությամբ։
Ուշադրություն
Երեխայի ՀԾՀ-ի վերաբերյալ տեղեկանք ստանալու համար անհրաժեշտ է այցելել երեխայի գրանցման վայրի անձնագրային բաժանմունք։
Պահանջվող փաստաթղթերը
ՀԾՀ-ի մասին տեղեկանք ստանալու համար անհրաժեշտ է ներկայացնել անձնագիրը և դրա պատճենը։
մինչև 16 տարեկան երեխայի դեպքում՝
- ծննդյան վկայականը (եթե չունի ՀՀ անձնագիր) և դրա պատճենը,
ՀՀ-ում կացության կարգավիճակ ունեցող օտարերկրացին՝
- ՀՀ-ում կացության կարգավիճակը հավաստող փաստաթուղթը և դրա պատճենը,
օրինական հիմքերով գտնվող օտարերկրյա քաղաքացին՝
- անձնագիրը և անձնագրի նոտարական կարգով վավերացված թարգմանությունը,
ՀՀ-ում մշտապես բնակվող քաղաքացիություն չունեցող անձը՝
- ՀՀ իրավասու մարմնի կողմից տրված քաղաքացիություն չունեցող անձի կացության վկայականը և դրա պատճենը,
փախստականի կարգավիճակ ունեցող անձը՝
- կոնվենցիոն ճամփորդական փաստաթուղթը և դրա պատճենը։
Ուշադրություն
ՀՀ քաղաքացի հանդիսանալու հանգամանքը պարզաբանելու անհրաժեշտության դեպքում 1981 թվականի նոյեմբերի 28-ից հետո ծնված օտարերկրացի դիմումատուները պետք է ներկայացնեն նաև ծնողների անձը հաստատող փաստաթղթերը, ծնողների ամուսնության վկայականը (բացակայության դեպքում՝ հայրության ճանաչման վկայականը կամ միայնակ մայր հանդիսանալու վերաբերյալ տեղեկանքը, կամ մահվան վկայականը)։
Վճարման չափը
ՀԾՀ-ի մասին տեղեկանքը տրամադրվում է անվճար։
Տրամադրման ժամկետը
Տեղեկանքը տրամադրվում է անմիջապես։
Հղում օրենսդրությանը
- «Հանրային ծառայությունների համարանիշի մասին» ՀՀ օրենք
- ՀՀ կառավարության՝ 2012 թվականի ապրիլի 5-ի N 419-Ն որոշում
Օրենքը հնարավոր է գտնել arlis.am-ում։
Տեխնիկական աջակցության համար՝
Աշխատանքային ժամեր`
10:00 - 18:00
Հեռախոսահամար`
0-8000-2020
(+374) 010 58-59-80
Ծառայության գծով աջակցության համար՝
Աշխատանքային ժամեր`
09:00 - 17:00
Հեռախոսահամար`
(+374 10) 37-02-64
Այս ծառայությունից հնարավոր է օգտվել նաև այլ եղանակներով։
Ծառայությունից տարբեր եղանակներով օգտվելիս կարող են տարբեր քանակությամբ ռեսուրսներ և ժամանակ պահանջվել։
Ծառայությունը մատուցող՝
ՀՀ ներքին գործերի նախարարության միգրացիայի և քաղաքացիության ծառայություն